قبل بداية البيزنس

 الحاجة الأولى: المعرفة

المعرفة الإدارية:

لازم تفهم الإدارة المالية، التسويق، الموارد البشرية،

التشغيل، المبيعات، وخدمة العملاء.

دي أساسيات في أي بزنس.

المعرفة الفنية:

كل نشاط له فنياته الخاصة.

مطعم غير مستشفى غير محل ملابس.

الخرافة الكبيرة:

مش لازم تشتغل موظف سنين

عندك 4 بدائل:

- تدرس وتتعلم كويس (عشان تسبق الوارثين)

- تشارك حد فاهم

- توظف حد فاهم

- تتوظف لفترة فى نفس المجال لاكتساب الخبره

أو تعمل الأربعة مع بعض.

وخليك فاكر إن :

السوق اليوم مش هايعلمك ... لكن هايخسرك.

الحاجة التانية: الفلوس

لازم تحدد المبلغ المطلوب حسب نوع النشاط.

وده هيتحدد بعد ما تعمل نموذج العمل بتاعك.

ما تنساش الرصيد الاحتياطي:

اللي يكفيك للصرف

خلال فترة الخسارة الأولى اللى ممكن تحصل.

وميزانية التسويق

لان هما لها بيخلو البزنس يفشل على باب السوق.

الحاجة التالتة: الوقت

ما تتخيلش إنك هتعمل سيستم وتسيب الشغل يمشي لوحده من الأول.

توقع هيتلخبط تماماً،

وإنك هتشتغل أكتر من الوظيفة بكتير في البداية.

الحاجة الرابعة: المهارة

تخلص من الخرافات القاتلة:

مافيش حرية مالية من أول شهر،

مافيش بزنس مضمون،

والبزنس غالباً هيكون أصعب وأكثر إجهاداً من الوظيفة.

لازم تكون واقعي وتتوقع الصعوبات والفشل في الأول.

الحاجة الخامسة: الأخلاق والسمات الشخصية

الأخلاق والثبات الانفعالي:

لازم تكون صبور، محترم، صادق، بتحب الناس وبتحب تخدمهم.

لو عصبي وبتتجاوز مع الناس،

هتخسر نفسك فلوس.

الإصرار والتواضع:

لازم يكون عندك إصرار وتواضع، وتتقبل إن هيكون فيه فشل في الأول.

السوق مش هياخدك بالأحضان، السوق هيلطشلك ويديك بوكسات

الحاجة السادسة: نموذج العمل

لو ما عندكش نموذج عمل واضح،

ما تصرفش جنيه واحد.

لازم تجاوب على الأسئلة دى:

من نحن؟

مين العملاء المستهدفين؟

إيه القيمة اللي هنقدمها؟

إزاي هنكون أحسن من المنافسين؟

هنبنيه إزاي؟

إيه التجهيزات والمعدات اللي محتاجينها؟

النقطة دي بالذات هي اللي بتحدد الفلوس اللي محتاجها.

هنكسب إزاي؟

إزاي هتدخل فلوس ؟

مثال حي:

لو عايز تعمل موقع بيع لكن مش عارف هتكسب إزاي

(من المحلات ولا العملاء؟)،

يبقى ما عندكش نموذج عمل ومتتحركش من مكانك.

بعد الـ 6 حاجات:

حول الكلام لأرقام

اعمل شيتات إكسل بتوقعات الإيرادات والمصروفات واحتمالات المكسب والخسارة.

احسب نقطة التعادل Break-Even ومتى تصل لها.

توقع إنك هتخسر قبلها وهتحتاج وقت قبل ما تبدأ تكسب.

خد بالك:

الأخذ بالأسباب أساس النجاح.

النجاح مش بالدعاء والصدقات بس

من غير أخذ بالأسباب الدنيوية.

لو ركبت عربية من غير ما تتعلم سواقة هتعمل حادثة،

حتى لو والديك بيدعولك.

مافيش حاجة اسمها صفر مخاطرة.

أي نشاط فيه مخاطرة، بس لازم تكون محسوبة.

النصيحة الذهبية: ابدأ صغير

لو نشاطك يسمح،

ابدأ صغير وجرب الأول قبل التأسيس الرسمي.

بعد ما تنجح وتتثبت، ساعتها تبدأ في تنظيم الأوراق الرسمية وتوسع.

البداية الصغيرة بتقلل المخاطرة بشكل كبير.

https://www.linkedin.com/posts/nadiamahmoud_aehaeyaepaexaerabraepaesaecaezaeraepaes-aex-activity-7382324112968331264-3p_V?utm_source=social_share_send&utm_medium=android_app&rcm=ACoAAFHPHkUBhaxHQOmXvmImTXIUJev9Ot4y4ok&utm_campaign=whatsapp&lipi=urn%3Ali%3Apage%3Ad_flagship3_feed%3B56KW1VYbT0Ssvl%2FBTvooVw%3D%3D