للأسف، جيلين من العرب لا يعلموا ولا يتذوقوا ولا يستسيغوا ٣٠ عاماً من بناء الكرامة والوعي والقيمة لبلدانهم وهويتها..!
جمال عبد الناصر لما استلم مصر ما ورثش مملكة مستقرة ولا جنة الله في الأرض زي ما المتباكين على العهد البائد بيحاولوا يوهموا نفسهم، ناصر استلم مجرد جغرافيا مستباحة، شبه دولة مخروبة، إرادتها ممسوحة، وثرواتها منهوبة لحساب الأجانب والباشوات.
- ناصر استلم البلد وفيها 80 ألف جندي بريطاني معسكرين فوق أنف الدولة في مدن القناة ، بيتحكموا في الرايحة واللي جاية، ومهيمنين على كل معبر يدخل سيناء، في وقت كانت فيه الحكومات الملكية بترتعد خلف جدران القصور والكل بيهادن المحتل، ناصر ما هادنش؛ أجبرهم بمنطق القوة إنهم يشيلوا شنطهم ويمشوا بجلاء غير مشروط في يونيو 1956، ولأول مرة ترتفع الراية المصرية لوحدها فوق كل شبر في مصر.
- تسلّمها والسودان منهوب ومخطوف، خاضع لحكم ثنائي على الورق بس، لكن السيطرة الفعلية والإدارة الكاملة كانت في إيد المحتل البريطاني اللي عزله تماماً عن جسده المصري، وما كانش للملك المفدى غير لقب كرتوني اسمه ملك مصر والسودان، ناصر كسر لعبة المحتل لما اعترف بحق تقرير المصير للأشقاء، وأحبط المؤامرة الاستعمارية عشان يولد السودان حر ومستقل بالتراضي والأخوة، والناس اللى بتبكي بحقد على احتلال سيناء لتلت سنين بعد النكسة، مش هسألهم ليه مابتبصوش لسنوات الوحدة مع سوريا؟! ليه بتعمي عيونكم عمداً عن عقود من ضياع السودان والسيادة الكاملة تحت أقدام الإنجليز؟؟؟؟!
- استلمها بلا جيش حقيقي يحمي أرضها وسماها، بل بجيش ديكوري للاستعراضات وطوابير الشرف، قوام ميتعداش من 10 آلاف لـ 20 ألف جندي.
كان دوره الأساسي والمُهين ينحصر في تأمين القصور الملكية، وقمع تظاهرات الشعب الغاضب في الشوارع، والمشاركة في الطوابير العسكرية والأعياد الملكية، جيش كانت البعثة العسكرية البريطانية هي اللي بتمشيه بالريموت كنترول؛ هي اللى بتحط المناهج، وتحدد كفاءة الضباط، وتمنع أي مناورات حقيقية تعاكس مصالح الإنجليز، الاحتلال كان رافض تماماً يدينا طيارات حديثة أو دبابات ثقيلة أو مدفعية متطورة، سابوا السلاح قديم ومستهلك، والرتب الكبيرة كانت بتتباع وتتوزع بالولاء للملك والقرب من حاشيته الفاسدة مش بالكفاءة، لحد ما اتعرفوا بقادة المكاتب والصالونات
والنتيجة المأساويه كلنا عارفينها
ناصر سلّم مصر وفيها جيش عقائدي مرعب يضم نصف مليون مقاتل؛ طهّر صفوفه بالمتعلمين وحملة المؤهلات، وبنى حائط الصواريخ الأسطوري اللى قص ضوافر طيران العدو، وساب الترسانة البشرية والعسكرية اللى دكت خط بارليف وصنعت ملحمة أكتوبر 1973.
- استلم مصر وهي عبارة عن سُخرة كبيرة؛ بيتسحق فيها 90% من أبناء الشعب تحت خط الفقر المدقع، ملايين من الحفاة، والمعدمين، ومرضى البلهارسيا، في مجتمع إقطاعي قذر كان معروف بمجتمع النصف في المائة، ما كانش في حاجة اسمها طبقة وسطى؛ يا إما إقطاعي فاحش الثراء بيمتلك آلاف الفدادين، يا إما فلاح أجير بيُجلد في الحقول عشان يرجع بيته بجوع عياله، ناصر قلب الواقع بقوانين الإصلاح الزراعي، ومجانية التعليم الكاملة لكل الناس، ودعم السلع الأساسية، طرد البطالة اللى كانت بتنهش 46% من الشباب وهبط بيها لـ 5% بس؛ بفضل ثورة تصنيع كبرى شيدت أكتر من 1200 مصنع، صهرت ملايين الحفاة دول في طبقة وسطى متعلمة ومحترمة، هي اللى بقت تقود الدواوين والمصانع، ميسورة الحال ومرفوعة الرأس.
- استلمها ورقعتها الزراعية محبوسة في شريط ضيق ومخلوق ما يتعداش 6 ملايين فدان، مفيش فيها أي أمان؛ تحت رحمة فيضان يغرق المحاصيل والبيوت، أو جفاف يموت الحرث والنسل. فأنشأ معجزة اسمها السد العالي—أعظم مشروع هندسي في القرن العشرين كله—وأضاف رغماً عن أنف أمريكا وضغوط البنك الدولي مليون فدان جديدة مستصلحة، وبقوانين الإصلاح الزراعي التاريخية، قلب الآية؛ وحوّل الأُجراء والمعدمين اللى كانوا بيتجلدوا في الأرض، لمُلّاك وأسياد فوق أرضهم اللى بيزرعوها بعرقهم.
- تسلّم البلد وهي مجرد ورشة تجميعية متخلفة؛ اقتصادها مشلول وقايم على إننا نزرع القطن الخام ونصدره لبريطانيا برخص التراب علشان تعيده لينا غزل وملابس بأسعار فاحشة، والبنوك وشركات التأمين ما كانتش مصرية، كانت مجرد فروع أجنبية بتمتص دم وخيرات المصريين علشان تمول مشاريع في أوروبا، ناصر نسف اللعبة دي بقرارات التمصير والتأميم التاريخية، وبنى قلاع صناعية استراتيجية عملاقة من الصفر؛ زي مصنع الكيماويات بأسوان (كيما)، ومجمع الألومنيوم بنجع حمادي، ومصانع السيارات والمحركات (النصر)، والترسانة البحرية بالإسكندرية، حقق بيها اكتفاء ذاتي سيادي.
- استلم العامل المصري وهو بيُعامل كأنه آلة ملوش أي قيمة؛ يُطرد في أي لحظة بالفصل التعسفي، وبيشتغل 16 ساعة في اليوم سُخرة، ومن غير تأمين صحي ولا كرامة تحميه، ناصر شرّع القوانين الاشتراكية اللى عملت للشغّالين والفلاحين هيبة وسلطة؛ حدد ساعات العمل بـ 7 ساعات بس، وجرّم الفصل التعسفي، واداهم نسبة 25% من أرباح الشركات اللى بيعرقوا فيها، والأهم من كل ده، إنه فرض تمثيل العمال والفلاحين بنسبة 50% في البرلمان ومجالس إدارات الشركات رغماً عن أنف الرأسمالية المتوحشة اللى كانت بتاكل حقهم.
- تسلّم ريف مصري منسي، بتفتك بأهله أمراض البلهارسيا والملاريا، وقرى غرقانة في ضلمة كحل عايشة على الشموع ولمبة الجاز، فأنشأ مشروع كهربة الريف الهائل المستمد من طاقة السد العالي، وبنى آلاف الوحدات الصحية والمستشفيات المجانية في كل القرى، وخلى المية النظيفة والنور والعلاج حق مكفول بقوة القانون لكل مواطن بسيط، من غير منّة ولا تفضل من حد.
- تسلّم الأزهر وهو معزول في أروقته التقليدية القديمة، ومحاصر بمحاولات تهميش دوره وإضعافه، فأصدر قانون تطوير الأزهر في 1961، وأنشأ فيه الكليات العلمية لأول مرة زي (الطب، الهندسة، الزراعة) علشان يتخرج الشيخ وهو طبيب وعالم ومهندس، شايل نور الإسلام الوسطي لكل بقاع الأرض، وأسس إذاعة القرآن الكريم في 1964، وجَمَع أول مصحف مرتل بصوت الشيخ الحصري لحمايته من أي تحريف.
تسلّم قطاع الإسكان وهو عبارة عن عشش صفيح ومقابر عايش فيها ملايين المشردين والمطحونين، في نفس الوقت اللى كانت فيه القصور الفخمة المحاطة بالحدائق الغناء محكورة على الفئة الباغية والباشوات، ناصر نسف العشوائية دي، وأنشأ لأول مرة إسكان متوسط ومحدودي الدخل، وشيّد مدن وأحياء كاملة من الصفر زي حي مدينة نصر، وأحياء العمال النموذجية في حلوان والمناطق الصناعية، ومش بس كده، ده فرض قوانين تخفيض الإيجارات بنسبة 50% عشان يحمي المواطن الغلبان من جشع وسادية المُلّاك، وحوّل السكن من رفاهية أرستقراطية لحق دستوري أساسي لكل مصري ومصرية.
- تسلّم المرأة المصرية وهي شبه جارية، غرقانة في غياهب التهميش، والجهل، وسلب الحقوق؛ لا ليها صوت يُسمع، ولا رأي يُستشار، ولا حق في انتخابات، فجاء دستور 1956 واداها حق الانتخاب والترشح السياسي لأول مرة في تاريخ مصر، وفُتحت قدامها أبواب العمل الحكومي، والمصانع، والجامعات بالمجان ومن غير تمييز، وعيّن أول وزيرة في تاريخ مصر (حكمت أبو زيد) عشان يثبت للعالم كله إن المرأة المصرية شريكة أساسية ولها صوت رائد في قيادة أركان الدولة وصناعة مستقبلها.
- تسلّم الثقافة والفن وهما حكر على الصالونات المخملية لعلية القوم وجاليات الأجانب اللى عايشين في غيبوبة عن الشعب، فقام بتأميم السينما ودعم إنتاجها الفني لحد ما وصلنا لأكتر من 100 فيلم في السنة، وأسس أكاديمية الفنون، والفرقة القومية للفنون الشعبية، ومسرح العرائس، وبنى السيرك القومي، وأطلق مشروع الثقافة الجماهيرية (قصور الثقافة) اللى خلّت قوافل التنوير، والكتب، والمسرح تلف كل نجع وقرية في أقصى الصعيد والدلتا، وصنع بايديه العصر الذهبي للفن العربي اللى لسه عايشين على خيره لحد النهاردة.
- تسلّم الإعلام وهو شوية صحف صفراء بتنشر أخبار النخبة والأكابر، وإذاعة محلية ضعيفة صوتها مبيعديش حدود العاصمة، في وقت كان فيه الفضاء العربي كله مستباح ومكشوف لإذاعات الاستعمار زي بي بي سي البريطانية اللى كانت بتوجه الرأي العام وتغسل عقول الناس عشان تكرس التبعية للمحتل، عبد الناصر فجر ثورة إعلامية مفيش قارة في العالم شافت زيها؛ أسس شبكة صوت العرب عام 1953 بقيادة أحمد سعيد، وعمل للبلد مدفعية ثقيلة عابرة للقارات بتلهم الثوار من الجزائر لليمن والخليج، وتهز عروش السلاطين والقوى الاستعمارية بكلمة واحدة وهي: "هنا القاهرة".
- وفي أول يوليو 1960، شيد صرح مبنى ماسبيرو الأسطوري وأطلق التلفزيون العربي (المصري) بـ 3 قنوات دفعة واحدة، وعمل سبق إعلامي وهندسي أذهل عقول الشرق الأوسط كله، وما اكتفاش بالبث المحلي بس، ده بنى أضخم شبكة إرسال موجهة بلغات قارات العالم الثلاث (آسيا، وأفريقيا، وأوروبا) علشان يدافع عن قضايا الشعوب المقهورة، وينشر الفكر التحرري، ويصهر الوجدان العربي كله من المحيط للخليج في بوتقة القومية العربية، وبقى الإعلام في عهده هو القوة الناعمة الضاربة اللى بيرتعد منها العدو قبل السلاح العسكري نفسه.
- تسلّم وطناً ملوش أي وزن على الخريطة الدولية، مجرد دولة تابعة مرتهنة في قرارها السياسي للسفارة البريطانية وحكومات لندن، سلّم مصر وهي قبلة لكل أحرار وثوار العالم؛ أسس حركة عدم الانحياز في باندونج 1955 علشان يصنع قطب عالمي تالت يرفض التبعية لروسيا أو أمريكا، وتحولت القاهرة للحصن والمموّل الفعلي والمباشر لكل حركات التحرر؛ من ثورة الجزائر واليمن لإفريقيا وحتى أمريكا اللاتينية.
عبد الناصر استلم خرائب عهد إقطاعي بالي تملكه أسرة مرتهنة للمحتل، وسلّم مصر لأصحابها الحقيقيين: العمال والفلاحين
عزيزة الجانب، مصونة العِرض، ومرفوعة الرأس رغماً عن أنف الكل.
#مصر_الناصرية
#حقيقة_العهد_البائد
