وزيرة التنمية المحلية والبيئة، منال عوض، عملت اجتماع بشأن أشجار شارع جامعة الدول العربية اللي اتقطعت تحت مسمى التطوير، ووجهت "بحصر ما تم قطعه من أشجار والوقوف على الأسباب التي أدت إلى اللجوء للإزالة بديلا للنقل"..
أما قايمة الحاضرين في بيان الاجتماع؛ اللواء محمد الطحاوي مساعد مدير الهيئة الهندسية للقوات المسلحة للإنشاءات، واللواء مؤمن سعيد مساعد مدير الهيئة الهندسية للطرق. الوزيرة بتسأل مين قطع الشجر.. واللي قطعه قاعد على نفس الترابيزة.
_ في مصر الجديدة.. حوالي 2500 شجرة اتقطعت في سنتين، 2019 و2020، في توسعة المحاور، بحصر مبادرة "تراث مصر الجديدة"....
- وسط القاهرة.. حديقة عرب المحمدي اتشالت بالكامل...
- الميريلاند؛ حوالي 10 آلاف متر مربع من الحديقة اتجرفوا وأشجار عمرها قرون اتقطعت، عشان يتبني مكانها نصب تذكاري بيحتفل بمشاريع الطرق والكباري...
- المعادي ومدينة نصر خدوا نصيبهم في نفس المخطط..
- الإسكندرية..أشجار معمرة بمحاذاة خط الترام اتشالت ضمن خطط التطوير من غير دراسة بيئية، زي ما وثقت زاوية ثالثة في تقرير ليها...
- أسوان.. محيط محطة القطر اتجرد من الأشجار بشكل شبه كامل...
- طريق قنا الأقصر حصل فيه نفس الشيء، وعلى طريق تاني للأقصر أكتر من 100 شجرة معمرة اتشالت والتبرير الرسمي: "خوفًا من سقوطها على الأجانب"...
- بورسعيد: شارع الجمهورية الفرنسي اتجرد، وحديقة فريال اللي فيها شجر من أيام الملكية...
- أما القرى، ودي الخسارة اللي محدش بيلاحظها أوي، تبطين الترع شال آلاف أشجار الكافور والتوت المعمرة اللي على الجسور..
الخشب بيتباع في مزادات علنية آخرها كان مايو اللي فات وكامت عاملاه وزارة الري، موثق برد رسمي منها على شكوى المحامي البيئي أحمد الصعيدي، لقطع وبيع 63 شجرة كافور على ترعة القاصد في الغربية، عشان توسعة طريق.
المحصلة إن مصر خسرت أكتر من 4 ملايين متر مربع من غطاء الأشجار في عشر سنين. والقاهرة لوحدها خسرت حوالي 911 ألف متر مربع من مساحاتها الخضراء بين 2017 و2020 بس. تلات سنين، نص مليون متر تقريبًا كل سنة ونص.
كل قطع الأشجار المستمر بيحصل واحنا كلنا عارفين تاثيره على الحر، والتغير المناخي، وخاصة في بلد زي مصر...
صيف 2024 كان الأسخن في تاريخ القياسات المصرية.. أسوان سجلت 51.9 درجة على سبيل المثال... دراسة منشورة في لانسيت للصحة العامة، بتسجل حوالي 2,591 حالة وفاة سنويًا في مصر بسبب الحرارة..
في موجة حر 2022 وزارة الصحة نفسها سجلت 76 وفاة و447 حالة دخلت المستشفيات... وموظف في هيئة الإسعاف قال لزاوية ثالثة إن الهيئة بتستقبل عشرات الحالات يوميًا من سواقي الموتوسيكلات والدراجات اللي بيقعوا من ضربات الشمس، في شوارع اتجردت من أي ضل..
وتقديرات كارنيجي بتقول إن التغير المناخي ممكن يضيف من 2000 لـ5000 وفاة سنوية في مصر، وخسائر بين 20 و48 مليار جنيه في السنة.
الدولة بتاخد من المصريين ضرايب على كل حاجة، الكهربا اللي لسه رافعين أسعارها، وعلى المواصلات والأكل والشرب واللبس وكل حاجة في تفاصيل حياتنا بندفع عليها ضرايب.. وأبسط حاجة أي دولة في الدنيا بترجعها لدافع الضرايب؛ مكان عام يقعد فيه ببلاش، مساحة خضرا، شجرة..
منظمة الصحة العالمية بتقول الحد الأدنى لنصيب الفرد من المساحات الخضراء 9 أمتار مربعة، والأمثل 25 متر...
الرقم الحكومي الرسمي في مصر، المنشور على موقع هيئة الاستعلامات وبلسان وزيرة البيئة نفسها..1.2 متر مربع، أقل من ثُمن الحد الأدنى العالمي.
لكن دراسة للمبادرة المصرية للحقوق الشخصية سنة 2022 حسبت النصيب الفعلي فطلع 17 سنتيمتر مربع... حط رجليك جنب بعض على الأرض، دي حصتك من الجنينة في بلدك.
والحصة دي نفسها متوزعة بالظلم..المبادرات الرسمية بتشجر الطرق السريعة والمدن الجديدة، وفقًا لتغطيات الصحف الرسمية نفسها، بينما القرى اللي خسرت كافور الترعة، والحي الشعبي اللي عمره ما كان فيه جنينة أصلًا، بياخدوا الأسفلت... اللي يقدر يشتري تكييف ويسافر الساحل بياخد كمان الشجر، واللي التكييف بتاعه هو الضل، بياخد الشمس.
والتطوير اللي من غير شجر بيعمل حاجة اسمها الجزيرة الحرارية.. الأسفلت والأسمنت بيخزنوا حرارة الشمس بالنهار ويطلعوها بالليل، فالمدينة بتبقى فرن مقفول حتى بعد المغرب... سكان القاهرة الكبرى حاسين بيه من غير ما يعرفوا اسمه.. الصيف بقى أطول وأتقل، والتلوث في هوا القاهرة بيتعدى الحدود العالمية بأكتر من 15 مرة... كل شجرة بتتقطع بتزود الفاتورة دي، حرارة وغبار وفواتير كهربا أعلى، على الكل، حتى اللي فرحان بالمحور الجديد.
الدولة عندها مبادرة رئاسية اسمها "100 مليون شجرة" انطلقت مع قمة المناخ، هدفها المعلن "مضاعفة نصيب الفرد من المساحات الخضراء". يعني الدولة معترفة إن الرقم هزلي، وبتزرع على الورق، وبتقطع على الأرض الشجر الحقيقي اللي عمره 50 و100 سنة...
الوزيرة لسه بتحصر مين قطع أشجار شارع جامعة الدول. أنا وفرت عليها الحصر.. اللي قطعها هو نفس اللي واعد يزرع 100 مليون بدالها... وبين المقطوع فعلًا والموعود على الورق، نصيبك إنت من كل ده.. متر وشوية. ولو على حسبة المبادرة المصرية، حتة بلاطة
No comments:
Post a Comment