فيه مجموعة من الباحثين بجامعة كاليفورنيا عملوا دراسة على مجموعات "بطاريق الإمبراطور" عشان يعرفوا الميكانيزم إللي بتتبعه البطاريق لتدفئة نفسها. ومن خلال تتبع نمط حركتها بكاميرات متطورة، الباحثين لقوا إن البطاريق بتتحرك بحاجة سموها "الفوضى المنظمة" أو الـ "Organized Chaos" لإنهم بعفوية ومن غير ترتيب ولا توزيع للأدوار بيقدروا يدفّوا نفسهم بمنتهى النظام والعدل.
إللي بيحصل إن البطاريق ف الأول بتتجمع جمب بعضها بشكل عشوائي، بعدها (وزي ما واضح في الرسم البياني ف تاني صورة) البطاريق إللي بتبقى موجودة ف مهب الريح تبتدي تتحرك وتروح على الجانب الآخر من المجموعة عشان تتجنب الرياح قارسة البرودة، ف البطريق من دول يقوم "زاقق" البطريق إللي جمبه إللي يزق إللي جمبه وهكذا.. وبالتالي - ومع الوقت - البطريق إللي بره يدخل جوه وإللي جوه يلاقي نفسه طلع بره ويعيدوا الكرة من تاني. وف أثناء الدورة دي، بيقدر البطريق الواحد إنه يدفّي نفسه داخل المجموعة إللي بتوصل درجة الحرارة جواها لـ 37 درجة مئوية ف حين إن درجة الحرارة الخارجية بتكون واصلة لـ 35 تحت الصفر.
الباحثين كمان لاحظوا إن ف كل مرة بتتجمع فيها البطاريق، ومهما كان شكل التجمع عشوائي ف الأول، فمع حركتهم والـ rotation المستمر إللي بيعملوه بيقدروا يكوّنوا شكل مستطيلي منتظم بجوانب مستقيمة وزوايا دائرية (زي إللي ظاهر في الرسم البياني ف تالت صورة)، والشكل ده تحديدًا بيسمح لهم بالحفاظ على الدفء داخل المجموعة لأطول وقت ممكن.
في التعليقات هتلاقوا المصدر وكمان فيديو لطيف جدًا بيوضح حركة البطاريق داخل تجمعاتها زي ما شرحناها في البوست (تحديدًا من الدقيقة 1:35)
No comments:
Post a Comment