10 نصائح للتصوير بالموبايل في السفر

الصور و النصائح بعدسة و قلم نورا محاريق

 فبراير، 2021

أداة التصويرهي وسيلة بتساعد المصور وتسهل عليه لكن عمرها ما كانت السبب لوحدها لالتقاط صورة حلوة فممكن بالموبايل تطلع صورة مميزة وجاذبة للعين بس المهم تفهم إزاي تستخدمه عشان تطلع صورة حلوة

ملحوظة كل الصور المعروضة تم التقاطها بالموبايل

نموذج رقم 1

وأنت بتصور راعي إن الخط الأفقي يكون مظبوط ومفيش ميل وكمان الخط الرأسي

ممكن تستعين في ده بأجسام من المكان ترشدك ، مثلا يكون في خط أفقي واضح من البحر أو الرمال أو مبنى موجود في المكان، وممكن تتظبط في الإيديت بس يكون حل أخير وفي أضيق الحدود عشان التصوير بالموبايل بيحتاج إن الصورة تبقى مظبوطة في الأساس والتعديل يكون بسيط وللضرورة عشان تحافظ على جودة الصورة وحجمها فالأفضل تكون مظبوطة في التصوير

مثال في الصورة المباني الرأسية ساعدت في ظبط الخط الأفقي والرأسي

نموذج رقم 2

إجعل مصدر الإضاءة في مواجهة العنصر المصور سواء شخص أو منظر طبيعي

لو مثلًا بتصور في ضوء الشمس فخليها في ضهرك وفي وش اللي بتصوره زي في الصورة الوردة منورة عشان الضوء جاي في وشها

نموذج رقم 3

مراعاة نقطة من النقاط الذهبية

الصورة متقسمة لخطين بالطول وخطين بالعرض ويوجد 4 نقاط نتيجة التقاء الأربع خطوط

في كاميرا الموبايل أو بالعربي أوبشن “مربعات” عشان تظهر الخطوط والنقاط الذهبية Gridاختار

ضع العنصر الرئيسي في الصورة في نقطة من النقاط الأربعة عشان العين بتروح لها

ومثال عملي في الصورة أربع دوائر باللون الأحمر على النقاط الأربعة الذهبية

Nadeem Fawzy

اسمحلي بتعديل هام بالنسبة لرقم 3 النقاط الذهبية هما نقطتين وليسوا 4 نقاط والقاعدة ليس اسمها النقاط الذهبية بل اسمها الثلث والثلثين third of thirds اشكرك

نموذج رقم 4

قاعدة التلت والتلتين أسهل وأوضح قاعدة للمبتدئين في التصوير

علي غرار ما تم اضاحه من قبل الصورة متقسمة لخطين بالعرض وخطين بالطول وفيه نقاط التقاط والصورة متقسمة 3 أتلات وأنت بتصور راعي إن الصورة تبقى متقسمة لتلت وتلتين فمثلًا البحر لو فيه موج وشكله ملفت وجميل خليه يبقى حيزه في الكادر تلتين والتلت الباقي للسما أو لو السما شكلها مميز وفيها سحاب خليها في تلتين والبحر في تلت

مثال عملي في الصورة: البحر موجود في تلت والسما واخد تلتين الصورة وكمان الصياد في التلت الشمال وباقي الصورة في التلتين زي ما الخطوط موضحة وممكن تظهر أثناء التصوير بالموبايل  والاوبشن اسمه “مربعات” أو ” “grid”

نموذج رقم 5

توقيت التصوير مهم جدا

 أفضل وقت للتصوير لما تكون الشمس هادية سواء الشروق أو الغروب وممكن وقت العصر

نموذج رقم 6

زاوية التقاط الصورة

اختار زاوية مختلفة ومنظور مختلف عن اللي العين متعودة تشوفه زي مثلًا الزاوية المنخفضة  لو محتاج منظور الضخامة زي جبال أو برج وومكن تكون الزاوية من فوق لو عايز تبين تفاصيل ولقطة عامة مختلفة  وتقدر تاخدها بإنك تطلع على مبنى عالي أو تاخد اللقطة من فوق لبحر أو زلط أو منظر جميل ملفت للانتباه

نموذج رقم 7

الهدف من التقاط الصورة مهم عشان يبقى الصورة ليها معنى وروح

يبقى فيه هدف واضح من الصورة زي إظهار جمال الطبيعة أو صورة تذكارية من المكان أو بورتريه لطيف مع تكوين مميز

نموذج رقم 8

العين هي أساس الصورة وسرعة الملاحظة

 العين بتلقط وتلاحظ الجمال أو الشيء غير المألوف زي مثلا السما أو البحر أو المياه

نموذج رقم 9

تنوع الألوان وانسجامها بيضيف وبيخلي الصورة جذابة ومميزة

ممكن دمج ألوان الطبيعة زي النيل مع الخضرة أو الرمال مع السما أو الصخور مع البحر

نموذج رقم 10

قبل ما تسافر شوف صور كتير للمكان

 لما تتفرج كتير هيبقى عندك مخزون في ذهنك تسترجعه لما تشوف منظر حلو وتقدر تلقطه بشكل مختلف وفيه طابعك الخاص ويساعدك تبدع أكتر ومش معنى كده إنك تقلد بالظبط المقصود إن تغذي عينك وتعودها على الجمال عشان لما تشوف منظر حلو تقدر جماله وتعرف تصوره بالشكل المناسب