منقول ....
الدنيا وقت كان بخيرا انا والطريفي صاحبي اي رقيص عروس في الحلة بنحضرو
قبل الصالات وكاميرات الموبايلات دي الرقيص والعيد كان عندنا واحد
ومرات بنعرف من اخواتنا الكبار .
هسي الناس الماشة عرس بسالو يقولو ليك الحفلة بي منو ؟
نحن كنا لا
أنا والطريفي زمان لا
بنقول البعلما منو
النفوس كان طيبة
و الناس دي كلها بترقص
البلد دي كان فيها تلاته
قسمة وبهاء وفائزة عيسي
كانو مثلث رعب كدة في رقيص العروس
العروس لمن تكون في حلتنا نحن بنحضر لينا زي تلاتين يوم تعليمة والتعليمة الاخيرة القبل يوم الرقيص دة انا والطريفي بنترتر عديل
بنمسك الرقيص دة من مبروك عليك الليلة يا نعومة
لغاية اللبسة التالتة الغنية الاخيرة
ست الفريق اللادن قواما
ما لهيجا سكر طاعم كلاما
مشية أمير قدم الحمامة
يا قليبي طير واجلس أماما
مع السلامة مع السلامة
الزمن مشي بينا وكبرنا شوية حرم علينا خلاص نحضر لينا رقيص تاني
يوم جاني الطريفي يضحك قالي لو قلتا ليك العايزين يعرسوها منو ما بتصدق ؟
قلتا لي منو ؟؟
قالي مهجة العوقه
مهجة يا جماعة من هي شافعة لطاخة السواد لكن من سننا وقدرنا وصاحبتنا
بترضع لمن عمرا حصل اربعه والبزة دي بسوطوها ليها لي خامسة ابتدائي
اهلها من حلالات الريف الشمالي وفي واحد من تجار الشنطة البمشو الزمن داك سوريا شافا وقال عايز يتزوجا
قالو ابوها لمن جا يشاورا اول سؤال سالتو ابوها قالت لي ابوي
بخليني ارقص
تحت تحت في ونسة اماتنا سمعنا مهجة عايزة ترقص
قلتا لي الطريفي عاد دة حدث بحصل كل مية سنه مرة ما بنفوتو
مهجة بدت تتعلم قبل قولة الخير
عقدو عليها وسدو مالا شهر سته
مهجة اجلت العرس من شهر تمنية لي شهرة عشرة عشان ما اتعلمت
اي فنانة جابوها ليها بتاخد اسبوعين وبتفوت منها قنعانه انو هي ما حتتعلم لمن جات قسمة بنفسا قالت بعلما
مهجة بعلمو فيها اربعه شهور باقي ليها عشرة يوم وتبقي مرا طالعة من بيت حبس
بنات الحلة كلهم المان بحضرن معاها التعليمة اتعلمن الا هي متل الصنم
ترترة ورا ما بتعرف ترترة قدام اليخربا
غايتو بعد مراق روح مهجة دي اتعلمت ليها ستة رقصات قالو بس خلاص ترقص بيهن .
رقيصا كان صبحية العرس
انا والطريفي العرس زاتو ما مشينا
عاد نحن ناس رقيص ساي وعايزين نرجع الماضي
الطريفي قالي خلي بالك نحن الرقيص دة الا نحضرو من سطوح ناس الهام
قلتا لي الهام دي شفعا مسلطين وبعرفونا وبفضحونا
نحن بس نحضرو من عريشة حبوبتك بي فوق لانو باقي البيت زنك لو طلعنا اي راس بيت بكون في كركبة واخير لينا شفع الهام من كركبة الزنك
اها يوم الرقيص دة انا والطريفي من العصر لابدين في راس البيت لي المغرب حتي جهزو الحوش للرقيص وجابو ليك مهجة دي ملفحة زي عمر المختار
الغنية الاولي
يمة الليله يوم سفرو
ما ودعنا قام قطرو
غنيه خفيفة ومهجة لسة مغتغتة
الغنية التانية
اللابس الاخدر
انا ما بقدر
عندو سماعه
معاها قطارة
دكترة دكترة دكترة
وترترا ترترا ترترا
اهاا الترترة التالته دي مفترض تفك فيها ربطة التوب
التوب ابا يتفكا
انا والطريفي قربنا نفلقا
الناس دي كلها ملاوزة الرقيص الفي راس مهجة يطير
وقسمة شغالة
شايل مسطرة
معاها منقلة
وهندسة هندسة هندسة
غايتو ترترت هندسة دي فكت التوب وفكت مهجة زاتا
والله مهجة تاني يوقفا الله
رقصت الفي المقرر والبرة المقرر
مهجة بتمشي تقول لي قسمة عيدي لي الغنية دي تاني
والله رقصت رقيص
شاتت الرقيص بي لبسة واحدة
اخواتا يكوركو ليها مهجة الغيار والتلبسية التانية
مهجة تعمل حركة المكاواة البي اليد ديك ومعاها دقة رجلا اليمين في الواطة
مهجة دي بتمشي هناك وتجي راجعة وانا والطريفي من سبلوقة االعريشة لي سبلوقة الصالون مرازة معاها
الزنك زاتو نسيناهو
بعد شوية قسمة قالت
وحدوووووه
انا والطريفي فوق رفعنا يدينا و بي صوت واحد
لا اله الا الله
وبقينا نقول
وري وري يا مهجة
وري وري يا مهجة
يمين الله الشباشب والجزم الاتفلقنا بيها تفتح بترينة في الشعبي
ما مغسني الا دكتور شول عمتي الاحمر جاني في صمة خشمي
والمهيرة مهيرة القصيص
انتي الملكة وحرس انجليز
حكوووومة يا عروسنا
عريسك غلبو الثبات
No comments:
Post a Comment